Nagdeklara og class suspension sa tanang lebel ang lungsod sa Cabanglasan gumikan sa Heavy Rainfall Warning nga gipagula sa PAGASA nga kasamtangang nakaapekto sa tibuok probinsya sa Bukidnon karong adlawa, Marso 9, tuig 2026.
Ang maong kamandoan naglakip sa tanang publiko ug pribadong tunghaan sa lungsod aron masiguro ang kaluwasan sa mga estudyante, magtutudlo, ug mga ginikanan batok sa hulga sa pagbaha sa mga ubos nga dapit ug pagdahili sa yuta sa mga kabukiran.
Gawas sa mga estudyante, wala na usab gipa-report sa ilang mga tagsa-tagsa ka tunghaan ang mga magtutudlo ug personnel, gawas kung adunay dinaliang koordinasyon alang sa emerhensya.
Giawhag sa lokal nga kagamhanan ang tanan nga magpabiling mabinantayon, likayan ang dili kinahanglanon nga pagbiyahe, ug padayon nga mag-monitor sa mga opisyal nga weather updates alang sa dugang mga pahibalo.