Gikuwestyon sa grupong Liga ng Transportasyon at Operators sa Pilipinas (LTOP) ang kaigo sa gihatag nga 10-piso nga fuel subsidy sa kagamhanan alang sa mga Public Utility Vehicles (PUVs).
Direktang gipaabot ni LTOP National President Orlando Marquez ang mulo ngadto kang Presidente Ferdinand “Bongbong” Marcos Jr., diin gihulagway ang ayuda isip layo ra sa tiinuod nga gikinahanglan sa mga drayber .
Giisip sa grupo nga dili makasulbad sa nagkagrabe nga krisis sa lana ang gamay nga kantidad sa diskwento nga gitagana sa gobyerno. Gawas sa isyu sa subsidy, nanawagan usab ang LTOP sa dinaliang pag-usab sa Oil Deregulation Law.
Sumala sa grupo, ang maong balaod naghatag og pabor sa mga dagkong kompanya sa lana samtang nagbilin sa mga yanong Pilipino sa kalisod.
Nagpadayag usab kini sa kabalaka nga kung i-agi sa botohay sa Kongreso ug Senado ang maong kausaban, mameligro ang interes sa katawhan tungod sa impluwensya sa mga gamhanan nga gusto magpabilin ang kasamtangang sistema sa presyo sa lana sa nasud.