Gipaniguro sa Land Transportation Office – Region 10 ang kahapsay ug kaluwasan sa mga byahedor ug motorista atol sa pag-obserbar sa Adlaw sa mga Santos ug Kalag-Kalag.
Sa eklusibong pakighinabi sa Bombo Radyo Malaybalay kang Regional Director Nelson Manaloto, Land Transportation Office – Region 10, gibutyag niini nga nagpahigayon ang buhatan og roadworthiness ug road safety inspection sa mga pampublikong sakyanan aron masiguro nga luwas ang pagbiyahe ug malikayan ang disgrasya.
Matud ni Manaloto, ang mga checkpoint nga gipahimutang sa mga dalan dili tumong aron malangan ang pagbyahe, kundili aron mapaligon ang road safety ug mahibal-an kung nagtuman ang mga drayber sa regulasyon sa trapiko.
Gipahibalo usab niini, nga hinay-hinay nang gipatuman ang 24/7 operation sa LTO aron makahatag ug taas nga serbisyo sa mga motorista sa panahon sa Undas .
Sa kasamtangan, wala pa’y natala nga pampublikong sakyanan nga nalapas sa mga lagda sa roadworthiness inspection, apan magpadayon ang monitoring ug assessment sa LTO-Bukidnon ug sa ubang probinsya sa rehiyon ugma adlawa, aron masiguro nga andam ang tanang ahensya sa pagdumala sa daghang byahe karong Undas 2025.