Gi-awhag ang tanan nga maglikay sa pagamit og ginadili nga mga substance kon illegal nga droga labi na ang mga drayber sa mga pampubliko ug mga pribadong sakyan, diin subling gipahugtan ang Random Drug Testing ug Roadworthiness Inspection sa Tanang pampasaherong sakyanan.
Sa pagkakaron, hingpit nga giila sa Land Transportation Office (LTO) nga usa ka standard nga pamaagi ang random drug testing ug roadworthiness inspection alang sa tanang pampublikong sakyanan. Matod ni LTO chief Vigor Mendoza II, dako kaayo og papel ang roadworthiness sa mga bus aron masiguro ang kaluwasan sa mga pasahero.
Dugang pa niini, gikinahanglan ang pag-implementar og surprise drug test ug routine vehicle check ups, isip usa ka paagi aron malikayan ang disgrasya ug masiguro nga ang mga drayber ug sakyanan andam sa kaluwasan sa karsada.
Gipahibalo usab sa LTO nga ipatuman kini nga palisiya sa tanang Public Utility Vehicles, lakip na ang jeepney, taxi, bus, ug uban pa.
Kahinumduman nga si Presidente Ferdinand Marcos Jr. misugo sa Department of Transportation (DOTr) nga magpatuman og hugot nga inspeksyon sa mga pampublikong sakyanan human sa sunod-sunod nga aksidente sa kalsada diin nagsugyot sa mga ahensya aron hugtan ang maong kalihukan.