Giawhag sa Mayor sa dakbayan sa Malaybalay ang publiko nga magpabilin nga disiplinado ug magtuman sa mga sumbanan aron masiguro ang hapsay ug luwas nga pag-obserba sa Adlaw sa mga Santos ug Kalag karong tuiga.
Sa eksklusibong pakighinabi sa Bombo Radyo Malaybalay kang Malaybalay City Mayor Jay Warren Pabillaran, giklaro niini nga ang katuyoan mao ang paglikay sa kagubot, aksidente, ug kalisang samtang daghang katawhan ang mobisita sa mga sementeryo aron mag-ampo ug mohatag og respeto sa ilang mga minahal sa kinabuhi.
Sumala usab ni Fr. Arnulfo Pana, Administrator sa Catholic Memorial Garden sa San Isidro Cathedral, mipasabot nga ang paghandom sa mga mitaliwan nga myembro sa pamilya usa ka importante nga bahin sa espirituhanong kinabuhi sa mga Kristiyano.
Dugang pa niini, nga dili lamang kini usa ka tradisyon apan usa ka buhing pagpamatuod sa pagtuo ug pagpasalamat sa Ginoo.
Nag-awhag usab ang simbahan sa tanan nga magpadayon sa maayong binuhatan, maglikay sa kagubot, ug magpabilin nga malinawon sa pag-obserba sa kalag-kalag.
Samtang si Lydia Quirante, residente sa Cabanglasan nga mibisita sa Orchard Road Memorial Park, nagpasabot nga dili usab mawala sa mga Pilipino ang mga tinuohan ug mga tradisyon sa paghinumdom sa mga Santos ug mga Kalag.
Matud pa niini, nga lakip sa mga tinuohan ang pagluto og pagkaon sama sa biko ug suman, paghaling sa insenso, ug pag-ampo uban sa pamilya.
Usa sa mga namisita sayo pa sa buntag mao si Clyde Adrian Cat-Melis, nga miluwat nga mas maayo ang pagsayo aron malikayan ang pagdagsa sa mga tao ug aron mas hapsay ang paghandum ug pag-ampo.
Samtang, nagpahimangno usab si FO3 Brent Clyde Suico, Media Relations Officer sa Malaybalay City Fire Station, sa publiko nga siguraduhon nga napalong ang tanan nga suga o plangka sa kabalayan ug nga wala’y nakasaksak nga mga appliances usa mogikan, aron malikayan ang posibilidad sa sunog samtang nagbisita sa mga sementeryo.
Dugang pa, gipahinumdoman usab niini ang publiko nga dili magdala og mga hait nga hinagiban, mga ilimnon nga makahubog, sugal, ug ubang butang nga makapahamtang og kagubot sa sementeryo.
Gihangyo usab niini ang katawhan nga magpakita sa disiplina, pagtinabangay, ug pagtahod sa balaan nga paghandum.