Tungod sa pag-init sa panahon og breeding season karon sa mga halas nag alerto ang City Veterinary Office batok sa posibleng insidente sa pagpamaak sa halas uban sa pag-awhag sa publiko nga likayan ang maong mananap ug sundon ang hustong first aid sa emerhensiya.
Sa eksclusibong pakighinabi sa Bombo Radyo kay Dr. Omar T. Cahanap, tigpamaba sa City Veterinary Office ning dakbayan nga kasagaran sa mga kaso sa pagpamaak nagagikan sa pagsuway sa mga residente sa pagdakop o pagpatay sa halas.
Tungod niini, nga mas angay nga ipahibalo dayon sa ilang buhatan ang presensya sa maong mananap aron ang Animal Control Section maoy muhimo sa hustong pagdakop, ilabina sa mga exotic ug wildlife nga kahayopan nga makasulod sa kabalayan.
Gipasabot niin nga sa higayon nga dunay mapaakan sa halas, kinahanglan nga dili lihokon ang napaakan nga parte sa lawas aron mapugngan ang paspas nga pagkaylap sa venom sa dugo.
Dili usab angay supsupon ang samad tungod sa posibleng risgo sa impeksiyon.Ang maong alerto kabahin sa padayon nga paningkamot sa lokal nga kagamhanan sa syudad sa Malaybalay sa pagpalig-on sa kahibalo sa publiko ug pagpanalipod batok sa mga delikadong mananap.