Nasakmit sa usa ka artist gikan sa Cabanglasan ang kampeonato atol sa gipahigayon nga soil painting competition sa Bukidnon Center for Culture and the Arts sa Malaybalay City niadtong milabayng adlaw, subay sa selebrasyon sa Kaamulan Festival ning probinsya sa Bukidnon.
Nakadaog kini og ₱100,000 nga premyo tungod sa talagsaong obra nga gihimo gamit ang yuta imbes pintura, nga nakapabilib sa mga hurado. Ang 4 by 8 feet nga artwork ni Phel Salmasan, usa ka lokal nga artist gikan sa Cabanglasan ug sakop sa tribung Umayamnon, naghulagway sa kinabuhi sa umahan, diin ang mais nahimong sentro sa iyang inspirasyon ug simbolo sa paningkamot sa mga lumad.
Sulod sa duha ka semana, nahuman niini ang maong obra nga nagdala kaniya og dungog isip usa ka local artist. Matud niini nga ang kapakyasan dili angay kahadlokan gumikan kini kabahin sa dalan paingon sa kalampusan.