Giingong lima ang patay, tulo ang kritikal human nawad-an og kontrol ang usa ka truck nga nagkarga sa mga trabahante sa pinya sa Barangay Lurugan, Valencia City, Bukidnon kagahapong adlawa, Pebrero 8, 2026.
Sa pakighinabi sa Bombo Radyo Malaybalay kay June Ray Valero, hepe sa City Disaster Risk Reduction and Management Office (CDRRMO), nga matod pa nahitabo ang disgrasya pasado alas 1:20 sa hapon sa Purok 4, Brgy. Lurugan. Nawad-an og preno ang maong truck gikan sa Kilang-ig padulong sa sentro, hinungdan nga napugos ang driver sa pagpadulong sa kanal ug pagbangga sa pader sa usa ka residente.
Giingong sakay sa truck ang pito ka trabahante sa pinya, samtang duha ka pasahero ang naa sa usa ka motorsiklo. Sa inisyal nga impormasyon, giingong lima ang namatay — tulo ka babaye ug duha ka lalaki — samtang tulo ang anaa sa kritikal na kahimatnag nga padayon pang nagpaalim sa balay tambalanan.
Matod pa ni Valero, ang lokal nga kagamhanan ug CDRRMO nagpadayon sa pagtabang sa mga biktima ug sa pagproseso sa ilang panginahanglan samtang giimbestigahan pa ang hinungdan sa aksidente.