Patay ang gituohang lider sa New People’s Army kon NPA human sa usa ka engkwentro tali sa pwersa sa militar sa Barangay Kasapa 2, Lapas, Agusan del Sur, duol sa boundary sa probinsya sa Bukidnon.
Sumala sa inisyal nga impormasyon, nahitabo ang engkwentro atol sa operasyon sa kasundalohan batok sa mga armado nga myembro sa rebelde nga grupo nga naglihok sa maong lugar.
Giila sa mga otoridad ang namatay nga si alyas “Tan-Tan,” nga gituohang lider sa Squad B, HQ, Force Neo, North Central Mindanao Committee sa NPA.
Base sa report, nakaangkon si “Tan-Tan” og samad pinusilan sa tiyan nga bahin, nga maoy hinungdan sa hinanaling kamatayon niini.
Kasamtangan, anaa sa Villanueva Funeral Homes sa syudad sa Malaybalay ang patay’ng lawas sa maong lider alang sa hustong pagdumala ug dokumentasyon.
Padayon pa ang imbestigasyon sa mga otoridad aron matino ang tibuok detalye sa engkwentro, lakip na ang eksaktong kahimtangan sa operasyon ug ang posibleng presensya sa ubang mga myembro sa NPA sa maong lugar. Kahinumdoman nga nahitabo ang engkwentro alas 4:19 sa hapon kaniadtong Enero 12, 2026.