Naghatag sa paglaum ang dugay nang gipaabot nga bakuna batok sa paak sa halas, human kini mahimong magamit na sa syudad sa Malaybalay—nga gilauman makatabang sa pagluwas sa kinabuhi sa mga biktima sa bitin.
Gipahibalo ni Malaybalay City Councilor Hon. Jayson Chad Ayala sa pakighinabi sa Bombo Radyo Malaybalay nga andam na gamiton ang Cobra anti-venom sa syudad, nga posibleng ipahimutang sa City Health Office aron masiguro ang husto nga temperatura niini.
Matud ni Konsehal Ayala, libre ang maong bakuna ug wala kini nagkinahanglan sa bisan usa ka sentimong kwarta sa lokal nga kagamhanan. Kini gipanag-iya nga personal nga inisyatibo sa mga opisyal nga ilang giambagan uban ni Mayor Jay Warren Pabillaran ug Dr. Ron Jerril Amba.
Gilauman sa lokal nga panggamhanan nga pinaagi sa pagkabutang sa bakuna sa syudad, mapadali ang medical response ug mas daghang kinabuhi ang maluwas sa umaabot nga mga emerhensiya.