Gipamatud-an na usab ni LeBron James ang kahanas sa basketball human niini gi-break ang rekord alang sa pinakadaghan nga dula sa regular season sa kasaysayan sa NBA.
Naabot sa 41-anyos nga superstar ang iyang ika-1,612 nga dula sa dihang midaog ang Los Angeles Lakers batok sa Orlando Magic.
Pinaagi niini, nalabwan ni James ang karaang rekord nga 1,611 ka dula nga gihuptan ni Robert Parish sukad pa niadtong 1997.
Hapit mapakyas ang espesyal nga gabii ni James sa dihang nilabaw ang Orlando, sa score nga 104-102, samtang tulo na lang ka segundo ang nahabilin sa dula.
Apan naluwas ang Lakers tungod sa “clutch” nga three-pointer ni Luke Kennard sa katapusang segundo.
Tungod niini nga kadaugan, nisaka ang rekord sa Lakers ngadto sa 46-25 ug mas nipalig-on sa ilang pwesto isip ikatulo sa Western Conference.