Usa ka talagsaong medikal nga misteryo ang giatubang sa 33-anyos nga abogadong si Stephen Chase gikan sa Utah, U.S.A., gumikan bisan wala kini pormal nga kahibalo sa pinulongang Espanyol gawas sa pag-ihap hangtod napulo, kalit lang siyang mahimong fluent sa pagsulti niini sulod sa 20 minutos matag mata niya gikan sa anesthesia human sa operasyon.
Nagsugod ang insidente sa dihang 19-anyos pa kini human sa usa ka knee surgery, ug nahimong pablik-balik ang iyang mga operasyon sa miaging dekada.
Sumala sa mga doktor, si Chase adunay Foreign Language Syndrome (FLS), usa ka talagsaong kondisyon nga adunay kapin 100 ra ka kumpirmadong kaso sukad niadtong 1907.
Sa pakighinabi kang Chase, iyang giingon nga samtang naa siya ilawom sa impluwensiya sa Foreign Language Syndrome, nagtuo siya nga Ingles ang iyang gisulti ug naglibog siya ngano dili siya masabtan sa mga nurse.
Sa iyang pagtuo, posibleng nakuha sa iyang subconscious ang pinulongang Espanyol tungod kay nidako siya sa lugar nga daghan og mga Hispanic.
Lahi kini sa Foreign Accent Syndrome tungod dili lang ang punto o accent ang mausab, kundili apil ang tibuok bokabularyo ug gramatika.