Patay ang usa ka 44-anyos nga lalaki human kini niambak gikan sa usa ka hanging bridge sa Purok 6, Barangay Lumbayao, Valencia City niadtong gabii sa Pebrero 15, 2026.
Sa exclusibong pakighinabi sa Bombo Radyo kay PLTCOL. Bryan M. Panganiban, hepe sa Valencia City Police Station, ang biktima giilang si Domino Alagos, lumulupyo sa Purok 12, Barangay Managoc ning syudad sa Malaybalay.
Sumala sa imbestigasyon sa kapulisan, naggamit ang biktima og galvanized wire nga gihigot sa iyang liog sa wala pa kini niambak sa tulay. Tungod sa kabug-aton, naputol ang maong wire hinungdan nga nahulog ang biktima sa Pulangi River. Nakadawat ang kapulisan og report mahitungod sa insidente pasado alas 8:30 sa gabii gikan ni Kagawad Larry Belidos.
Gibutyag ni PLTCOL. Panganiban nga walay nakitang “foul play” sa hitabo ug duna silay narekober nga suicide letter gikan sa biktima. Matud pa sa anak ni Alagos, tulo ka adlaw sa wala pa ang trahedya, duna na silay naobserbahan nga katingad-an ug dili ordinaryo nga linihokan sa ilang amahan.
Sa pagkakaron, ang patayng lawas sa biktima anaa na sa Villanueva Funeral Homes. Nanawagan usab ang kapulisan sa publiko nga seryosohon ang mga isyu sa mental health ug mangayo og tabang sa pamilya o mga eksperto kon duna silay giatubang nga bug-at nga problema.