Gipusil ang usa ka 57-anyos nga lalaki sa Kalilangan Bukidnon kagahapong adlawa, hinungdan nga anaa kani sa kritikal nga kondisyon.
Sumala sa otoridad, nahitabo ang insidente sa Purok 2, Central Poblacion alas 10:06 sa buntag diin ang biktima, usa ka panday, gidala dayon sa balay tambalanan. Sa inisyal nga imbestigasyon, nasuta nga adunay dugay nang personal nga panaglalis ang biktima ug ang 46-anyos nga suspek. Giingong misulay og sundang gamit ang bolo ang biktima, hinungdan nga mibalos ang suspek pinaagi sa pagpusil gamit ang .38 revolver nga nakaigo sa dughan ug likod sa biktima.
Mikalagiw ang suspek apan nasikop sa hot pursuit operation sa Sitio Kimbaroy, Barangay Kinura uban sa tabang sa mga opisyal sa barangay ug BPSO. Narekober sa iya ang armas, mga bala ug uban pang ebidensya, samtang padayon ang imbestigasyon sa kapulisan sa maong insidente.