Padayon ang hot pursuit operation sa kapulisan human sa nahitabong pagpamusil sa Purok 14, Poblacion, Quezon, Bukidnonn kagahapong adlawa, Enero 10, 2026, alas 9:20 sa buntag.
Nakadawat matud pa og tawag ang Quezon Municipal Police Station kabahin sa pagpamusil nga mibiktima sa usa ka 50 anyos nga lalaki nga nailhan sa alyas “Toto.”
Girespondehan gilayon sa mga otoridad ngadto sa maong lugar aron beripikahon ang impormasyon.
Pag-abot sa crime scene, nakarekober kini og usa ka basiyo nga bala sa gituohang gikan sa .45 caliber nga pusil.
Sa inisyal nga imbestigasyon, nabal-an nga sa wala pa ang insidente, ang biktima nagmaneho sa motorsiklo niini daplin sa dalan sa tubuhan, sa dihang kalit kining gipusil usa ka higayon sa dughan sa wala mailhing suspek.
Gikatahong ang suspek nagsul-ob og itom nga jacket ug nagmaneho usab og itom nga motorsiklo, ug dayon miikyas paingon sa kasikbit nga barangay.