Gipailawom na sa kustodiya sa 1003rd Maneuver Company sa Regional Mobile Force Battalion 10 ang lima 5 ka myembro walhong grupo sa Communist Terrorist Group nga boluntaryong mitahan na balik sa sabakan sa gobyerno sa Sitio Colon, Barangay Halapitan, San Fernando, Bukidnon.
Lakip sa misurender ang usa ka indibidwal nga giila isip high-risk ug upat ka non-priority risk.
Gitago kini sa mga alyas nga “Junrey,” 21 anyos, team leader sa usa ka yunit sa rebeldeng grupo, nga misurender usab og usa ka caliber .45 pistol lakip ang pito ka bala; alyas “Jimboy,” 35 anyos, supply officer, nga gisurender ang caliber .38 revolver lakip ang upat ka bala; alyas “Muran,” 25 anyos, supply officer, nga misurender usab sa shotgun lakip ang unom ka bala; alyas “Buts,” 18 anyos, supply officer, nagdala og caliber .22 revolver lakip ang duha buhing bala; ug alyas “Pael,” 28 anyos, squad leader, nga misurender sa shotgun lakip na ang lima ka bala.
Ang tanang misurender gikaingong lumad sa Sitio Nalubas, Talaingod, Davao del Norte. Sumala sa mga otoridad, boluntaryo nga misurender ang maong mga indibidwal human gikapoy sa kanhi kinabuhi sulod sa illegal nga armadong kalihukan ug sa tinguha nga mabuhi nga malinawon uban sa mga pamilya.
Dugang pa, nga dakong impluwensya usab ang nahimo sa kanhing mga kauban nga una nang misurender ug nakadawat og tabang gikan sa gobyerno, hinungdan nga ilang gipili ang pagbiya sa armadong pakigbisog ug pagsugod og bag-ong kinabuhi.
Sa pagkakaron, gipailawom ang mga mitahan sa hustong debriefing ug profiling, samtang ang tanang armas ug bala nga gitugyan temporaryong anaa sa Supply Office sa maong yunit alang sa legal nga disposasyon.
Kahinumdoman nga mitahan balik sa sabakan sa gobyerno ang lima ka myembro sa walhong grupo kaniadtong Enero 4, 2026.