Gibatikos ni Senate President Pro Tempore Panfilo “Ping” Lacson ang paggamit sa ”ad hominem” o personal nga pag-atake batok sa mga opisyal ug mambabalaod nga nagabarug alang sa soberanya sa Pilipinas sa West Philippine Sea (WPS).
Kini ang tubag ni Lacson human sa pahayag ni Rep. Paolo Henry Marcoleta nga himoong bala sa kanyon ang pipila ka senador ug usa ka tigpamaba sa Philippine Coast Guard, kung magdeklara og gubat ang China batok sa Pilipinas.
Ang maong pahayag ni Marcoleta misunod human gibatikos ang iyang amahan tungod sa sugyot nga ihatag ang Kalayaan Island Group (KIG).
Subay niini, gi-awhag ni Lacson ang batan-ong Marcoleta nga bisitahan ang Pag-asa Island sa KIG, nga sakop sa lalawigan sa Palawan, aron personal niyang makita nga adunay lig-on ug naglihok nga lokal nga panggobyerno sa lugar.
Gipunting sa senador nga ang KIG usa ka munisipalidad sa Palawan nga adunay buhing komunidad ug naglihok nga gobyerno.
Gipaambit usab niini ang iyang personal nga pagbisita didto, diin nakita niya mismo ang paglibot-libot sa mga barko sa Chinese Coast Guard, ug gidasig ang mga pwersang militar nga padayon nga depensahan ang teritoryo sa nasud.
Kahinumduman nga sa usa ka online nga pahayag niadtong Pebrero 6, gitawag sa batan-ong Marcoleta nga “taksil” ang mga gabarug alang sa WPS ug giingon nga ilang gibutang sa peligro ang kinabuhi sa mga Pilipino.