Gironda sa kapin 300 ka personahe sa kapulisan ang kota sa Moro National Liberation Front kon MNLF sa Purok-15, Barangay Butong, lungsod sa Quezon, Bukidnon, kagahapong adlawa.
Ang maong joint search warrant operation miresulta sa pagkadakop sa pito ka miyembro sa grupo.
Nakumpiska atol sa operasyon ang nagkalain-laing tag-as ug mugbong armas de fuego, mga bala, granada, improvised explosive devices (IEDs), mga unipormeng militar, ug ubang gamit nga gituohang kabahin sa ilang kalihokan.
Samtang, giangkon sa gitudlong adviser sa gituohang grupo sa MNLF nga ubay-ubay pa ang miyembro sa grupo sa lalawigan sa Bukidnon.
Sa eksklusibong pakighinabi sa Bombo Radyo Malaybalay kang Pitz Patric Cua, gitudlong adviser, 48 anyos, minyo, ug residente sa Carmen, North Cotabato, gikumpirma niini nga miyembro sila sa MNLF ilawom sa liderato ni Nur Misuari.
Gibutyag ni Cua, nga misulod ang grupo sa lalawigan sa Bukidnon niadtong Pebrero 19, ning tuiga. Gipanganlan usab niini, nga si Kusain G. Tangkulo matud pa ang state Chairman sa grupo, diin gikaingong miabot usab sila sa Jolo, Sulu, ug sa Zamboanga.
Miluwat si Cua, nga ang tumong matud pa sa ilang grupo mao ang kalinaw ug pagpanalipod sa katawhan ug giklaro nga wala kini kalabutan sa pagpangilog sa luna.
Dugang pa niini, nga wala sila nangita og kasamok ug wala silay eksperensiya nga adunay naka-engkwentro apan sila matud pa ang gipaulanan og bala ug granada.
Samtang, wala kini mihatag og dugang pamahayag kabahin sa mga armas nga posibleng gigamit sa kalihukan.