Mikabat na sa kapin 500 ang kumpirmadong patay sa serye sa mga kilos-protesta sa Iran. sumala sa datos nga gipagawas sa US-based human rights group nga HRANA, diin naberipika ang pagkamatay sa 490 ka protesters ug 48 ka security personnel samtang kapin sa 10,600 ka tawo ang naaresto sulod sa duha ka semana nga kagubot.
Apan sa pagkakron, wala pa’y opisyal nga datos gikan sa gobyerno sa nasud sa Iran.
Sa state television sa Iran, gipakita ang dose-dosenang mga bag sa mga patayng lawas sa coroner’s office sa Tehran, diin giingon nga biktima kini sa mga insidente nga gihimo sa “armadong terorista,” ug gipakita usab ang mga mahal sa kinabuhi o pamilya sa mga biktima nga nagahulat sa gawas sa Kahrizak Forensic Medical Centre samtang gilauman ang pag-ila sa mga patayng lawas.
Ang maong panghitabo gikabalak-an karon United Nation diin matud pa ni UN Secretary-General Antonio Guterresnanawagan og maximum restraint samtang giinsistir ang pagrespeto ug pagprotekta sa mga katungod sa katawhan sa kagawasan sa pagpahayag, asosasyon, ug malinawong panagtigom.
Niadtong Domingo, gipahibalo sa mga awtoridad sa Iran ang tulo ka adlaw nga national mourning aron hatagan og pagpasidungog ang mga biktima nga gitawag nilang “martyrs” sa ilang pagsupak batok sa Amerika ug Zionist regime.
Ang mga protesta nisugod niadtong Disyembre 28, 2025 tungod sa krisis sa ekonomiya, record-high inflation, taas nga presyo sa pagkaon, ug pagkunhod sa kantidad sa rial, nga misangpot sa pag-awhag sa pagtapos sa kasamtangang rehimen nga nagdumala sukad pa niadtong 1979 Islamic Revolution.
Giakusahan sa Iranian authorities ang US ug Israel sa paglala sa kagubot ug mipatawag og nationwide rally aron kondenahon ang giingong teroristang aksyon nga gipangulohan sa Amerika ug Israel.