Nagpatawag ang konseho og komite isip “Committee as a Whole” uban sa mga konsehal ug mga resource person aron atubangon ang nagpadayon nga krisis sa tubig nga nakaapekto sa daghang residente sa siyudad.
Sa pakighinabi sa Bombo Radyo Malaybalay ngadto kang Konsehal Niko Aldeguer, saysay pa niini sa iyang privilege speech ug proposed resolution sa Konsehal nga dako ang kapakyasan ug daghang paglapas sa kasabutan sa joint venture tali sa PrimeWater ug Malaybalay City Water District. Matod niya, dili na kini imbestigasyon kay kompleto na ang datos ug klaro ang mga ebidensiya sa kapakyasan sa serbisyo.
Sa laing bahin usab gihisgutan sab ang kontrobersyal nga joint venture niadtong 2019 nga wala nakagiya sa public hearing, hinungdan sa dakong kasuko sa publiko. Apan, giklaro sa konsehal nga adunay kaugalingong charter ang water district, busa legal kini nga misulod sa kasabutan bisan wala’y pagtugot gikan sa Sangguniang Panlungsod.
Gilauman nga ang pagtuki sa komite makatabang sa paghatag og klarong direksyon ug solusyon sa nagpadayon nga problema sa suplay sa tubig sa syudad