Giandaman sa buhatan sa Malaybalay City Water District kon (MCWD)ang posibleng kakulang sa suplay sa tubig atol sa umaabot nga Northern Mindanao Regional Athletic Association kon (NMRAA) nga ipahigayon sa lalawigan sa Bukidnon.
Kini ang gibutyag ni Engr. Nolito S. Binahon, General Manager sa Malaybalay City Water District, nga posibleng dili igo ang kasamtangang suplay sa tubig sa syudad alang sa kapin 9500 ka mga delegado sa maong kalihukan.
Samtang nagpadayon ang mga pagpangandam, gisiguro usab sa Department of Education – Bukidnon Division pinaagi ni Mr. Said Macabago, Public Schools District Supervisor ug Division Information Officer, nga nakig-alayon sila sa mga buhatan nga makahimo og water logistics support ug paghatag og dugang water tanks kon gikinahanglan.
Sa laing bahin, gipasalig ni Jay Warren R. Pabillaran nga hugot nga gitutokan sa lokal nga panggamhanan ang nag unang panginahanglanon sa mga delegado sama sa panubig, matulgan ug uban pang serbisyong magpalig-on sa seguridad ug kaayohan sa tanan nga muapil sa maong kalihukan.
Ang maong mga lakang kabahin sa paningkamot sa mga ahensya sa local nga panggamhanan aron maseguro ang malinawon ug hapsay nga pagdumala sa NMRAA sa probinsya.