Mag-atubang og krisis sa ekonomiya ug trabaho ang Pilipinas gumikan sa nagpadayon nga tensiyon sa Middle East nga naglambigit sa Iran. Kini sumala kang Ray Talimio Jr., kanhi miyembro sa Oro Chamber ug Economic Development Committee sa RDC-X.
Matud niini, isip usa ka net importer sa lana, ang nasud maoy unang maigo sa pagkabalda sa suplay sa enerhiya gikan sa Saudi Arabia ug uban pang tinubdan, nga mosangpot sa pagsaka sa presyo sa krudo, gasolina ug kuryente ug magdala og inflation o paspas nga pagsaka sa presyo sa pagkaon ug batakang panginahanglanon.
Gawas sa aspeto o hisgutanan sa pananalapi, dako usab ang kabalaka sa seguridad sa mga Overseas Filipino Workers (OFWs), sumala kang Ray Talimio Jr.
Iyang gipunting nga dili lamang ang Iran, United States ug Israel ang mahimong maapektuhan, kondili lakip usab ang mga nasud sa Gulf States sama sa United Arab Emirates ug Qatar, diin adunay mga base militar sa Amerika ug daghang nagtrabahong mga Pilipinas.