Gibutyag sa “Queen of All Media” nga si Kris Aquino nga aduna siya’y deep vein thrombosis (DVT), usa ka seryosong kondisyon diin adunay namugna nga mga blood clots o tibugol nga dugo sa iyang ugat.
Sa iyang Instagram post niadtong Pebrero 1, gipaambit ni Kris nga unom na ka semana siyang na-confine sa ospital ug naglaum nga makapauli na sa dili madugay. Sumala sa iyang gipasabot, dili pa siya mahimong mobiyahe sakay sa eroplano hangtod nga dili pa mawala ang mga blood clots sa iyang lawas.
Bisan pa sa iyang gihambing nga sakit ug ang uban pa niyang autoimmune diseases, nagpabiling positibo si Kris. Gani, naghinam-hinam na usab siya sa iyang pagbalik pinaagi sa usa ka video podcast nga iyang sugdan depende sa iyang kondisyon. Padayon usab ang iyang pagpangayo og pag-ampo alang sa iyang hingpit nga pag-ayo samtang nag-focus siya sa iyang rehabilitasyon sama sa pag-ehersisyo ug paglangoy.