Laumang matapos sa bulan sa Marso ang Bukidnon Airport.
Kini ang gipasigarbo ni Atty. Oliver Owen L. Garcia ang paspas nga dagan sa konstruksyon sa Bukidnon Airport sa Don Carlos. Matud niini, anaa na sa Phase 6 samtang nagpadayon ang ubang mga hugna sa proyekto.
Dugang pa ni Atty. Garcia nga kung mahuman kini sulod sa tuig, mahimo kining usa sa pinakapaspas nga natapos nga airport sa tibuok Pilipinas, tandi sa mas dugay nga nahuman nga Laguindingan Airport.
Bisan pa sa mga hagit sa COVID-19 ug mga problema sa supply chain, nagpadayon ang determinasyon sa gobyerno nga mapadali ang maong proyekto.
Gikumpirma usab ni Atty. Garcia, isip Chairman sa Committee on Engineering sa Sangguniang Panlalawigan sa Bukidnon, ang mahinungdanong usab ang disenyo sa nagpadayong konstruksyon sa Bukidnon Airport.
Sa gipahigayon nga panagtigom kauban ang Civil Aviation Authority of the Philippines (CAAP), Department of Transportation (DOTr), ug ang mga contractors, diin gibutyag nga gipalapdan ug gipatas-an ang runway sa maong tugpahanan.
Gipahibalo ni Garcia nga ang dakong porsyon sa runway nga gidumala sa contractor nga MAMSAR gilaumang mahuman na sa katapusan sa Hunyo. Ang maong runway adunay gitas-on nga 1.650 kilometro ug gilapdon nga 45 metros.
Bisan pa man og mahimo na kining landigan sa mga gagmayng eroplano, gipasabot ni Garcia nga kinahanglan pa ang dugang paghulat alang sa operasyon sa mga commercial planes sama sa turboprops ug jets.
Kini tungod kay gikinahanglan pa nga mahuman ang tibuok extension sa airport aron masiguro ang kaluwasan ug kapasidad alang sa mas dagkong matang sa aircraft.