Dismayado si Malaybalay City Mayor Jay Warren Pabillaran sa Water District ug Prime Water labot sa dili maayong serbisyo niini sa mga konsumante.
Nasayrang gikan tuig 2020 pa lamang hangtod niining tuiga, nagpabiling wala gisolusyunan sa hingtungdan ahensiya ang mulo sa mga konsumante. Sa saad matud pa sa joint venture sa duha ka kompanya, mugahin matud pa ang mga nahisgutan og P200 milyon nga pondo aron palambuon ang serbisyo, apan wala kini natuman ug taman lang matud pa sa plano.
Gumikan sa nagpadayong problema, giawhag sa mayor ang mga Board of Directors nga pangitaan og solusyon sa labing dali nga panahon. Apan, sa higayong di kini matuman, mamahimong ipa-iterminate ang Prime Water ug hulipan og laing water service provider.
Mipahayag usab ang Mayor nga wala na kini manghilabot sa kontrata kaniadto, apan sa kakuwangon sa serbisyo karon, kini na mismo matud pa ang nangita og paagi.
Paningkamotan sab matud pa niini nga ipatawag ang tanang Board of Directors sa Prime Water alang sa usa ka miting human sa eleksiyon, lakip na ang mga miapruba sa maong kasabutan.
Sa pikas bahin, anam-anam ng nangita og paagi ang lokal nga kagamhanan aron masolusyunan ang nagpadayon mulo sa mga konsumante ngadto na sa Prime Water. Sa nahimong eksklusibong pakighinabisa Bombo Radyo Malaybalay Bukidnon, mugahin og P250 milyon pesos ang lokal nga pangamhanan gikan sa ubang mga partners aron sugdan ang pagmugna sa tuburan sa syudad sa Malaybalay.
Apan, dili matud pa kini igo aron nga hingpit nga makahatag og kasulbaran sa problema sa tubig sa tibuok syudad. Gani, isip mayor, dako matud pa ang respeto ni Pabillaran sa maong kasabutan rason nga wala na lamang niini tanduga ang Poblacion. Dugang pa sa Mayor, gipatawag na matod pa ang manager sa Prime Water kaniadto mahitungod sa joint venture lakip na ang mga kakulangon sa ilang serbisyo.
Gitambagan sab matud pa ang Prime Water sa wala pa kini nagsugod nga angay unang musugot ang konseho, apan gibarugan sa board of directors ug manager sa Water District lakip na sa Prime Water nga dili na kini kinahanglan pa.
Apan, gibarogan sa Prime Water nga wala matod pay sumbanan nga angay pagasundon. Gumikan sa ilang mga baroganan, gipirmahan ang joint venture sa Water District ug Prime Water, dayon giapprobahan sa 3 ka appointed board of directors kaniadto sa syudad sa Malaybalay. Samtang, gipadalhan na usab kini og restraining order, apan nakalusot pa gihapon matud pa kini.