Giduso karon sa Sangguniang Panlungsod sa Malaybalay City ang paghatag og mas lapad nga otoridad sa Barangay Public Safety Officers kon BPSO aron makapangdakop ug makapag-isyu og ticket sa mga menor-de-edad ug katawhan nga mulapas sa curfew ug uban pang mga balaod nga gipatuman sa syudad.
Sa pakighinabi sa Bombo Radyo Malaybalay kang Konsehal Julius Maghano, Liga ng mga Barangay President ug Chairperson sa Peace and Order & Public Safety Committee sa Malaybalay City, gibutyag niini nga giduso nga pormal nga hatagan og otoridad ang mga BPSO sa pagpangdakop ug pag-isyu og citation tickets hilabi na batok sa mga molapas sa curfew, mag-inom sa gawas sa gitakdang oras, ug sa mga kalihukan nga supak sa city ordinances.
Gipasabot sa Konsehal, nga gikinahanglan ang mas istrikto nga pagpatuman sa balaod sa pampublikong lugar tungod paduol na ang Kaamulan Festival, diin gilaoman ang pagdagsa sa katawhan ug mga kalihokan sa syudad.
Ang maong ordinansa gipasa na sa konseho ug karon naghulat na lamang sa Executive Order gikan sa Mayor alang sa pormal nga implementasyon.