Giduso karon sa Sangguniang Panlungsod sa Malaybalay City ang hingpit nga pagpahawa sa PrimeWater tungod sa kapakyasan ug palpak nga serbisyo sa panubig sa dakbayan.
Sa eksklusibong pakighinabi sa Bombo Radyo Malaybalay kang Konsehal Jayson Chad Ayala, gibutyag niini nga dako ang posibilidad nga dili na marenew ang business permit sa PrimeWater tungod sa daghang reklamo ug mga obligasyong wala niini matuman.
Matud ni Konsehal Ayala, kanunay nga ginasingil ang mga konsumidor sa bayrunon sa tubig bisan wala’y regular nga agas ug klarong suplay nga nadawat sa daghang kabalayan sa syudad.
Dugang pa niini, dili makatarunganon ug dili angayan ang kahimtangan sa serbisyo sa PrimeWater nga hinungdan sa kalisod ug pag-antos sa katawhan.
Gibutyag usab sa konsehal, nga ang konseho padayon nga nagtan-aw sa legal ug administratibong pamaagi aron hingpit nang matangtang ang kompanya ug mapangita og alternatibong solusyon nga makahatag og lig-on, patas, ug kasaligan nga serbisyo sa panubig alang sa mga lumuluyo sa Malaybalay City.