Usa ka manatee sa Florida nga gibana-banang nag-edad na og dili momubo sa 71 anyos ang opisyal nga gideklarar isip kinatigulangang manatee sa kasaysayan sa Guinness World Records.
Matud pa sa rekord sa Guinness ginganlan kini og Romeo nga kasamtangang nagpuyo sa Gulfarium sa Okaloosa Island, nakit-an sa so-ok nga dapit niadtong 1957 ug gibana-banang nag-edad na og 2 hangtod 5 ka tuig niadtong panahona. Tungod niini, si Romeo labing menos 71 anyos na karong tuig 2026 ug posible pa nga mas magulang pa niana.
Kadaghanan sa kinabuhi ni Romeo anaa didto sa Miami Seaquarium, sa wala pa kini gibalhin sa Zoo Tampa niadtong 2023 ug niabot sa Gulfarium niadtong 2025. Nakabaton si Romeo og siyam ka anak uban sa iyang partner nga si Juliet, kinsa namatay sa edad nga 65 niadtong Abril 2024.
Kasagaran, ang mga manatee mabuhi lamang og 30 hangtod 40 ka tuig sumala sa mga opisyal sa Gulfarium. Ang nahaunang rekord sa kinatigulangang manatee gihuptan ni Snooty, kinsa namatay sa edad nga 69 niadtong Hulyo 2017 sa South Florida Museum sa Bradenton.