Balhug sa bilanggoan ang usa ka kawatan human masikop sa Barangay Sinayawan, Valencia City, human kini mosulod ug mangawat sa usa ka panimalay ug midunggab pa gyud sa tag-iya gamit ang star-type screwdriver pasado alas 2:00 sa kaadlawon, kagahapongg adlawa.
Sa imbestigasyon sa kapulisan, giingong misulod ang suspek pinaagi sa sliding glass window. Nasakpan siya sa 49-anyos nga babaye nga tag-iya sa balay, hinungdan nga iyang gidunggab ang biktima.
Tungod sa kusog nga kasaba sa komusyon, nakamata ang anak sa biktima ug nangayo kini og tabang, hinungdan nga midagan ang suspek. Apan dali ra siyang naabtan ug nasikop sa mga Barangay Police Security Officers (BPSO).
Nakuha gikan sa suspetsado ang ₱400 nga kwarta, star-type screwdriver, ug usa ka cellphone nga gipanagiyahan sa anak sa biktima.
Gidala dayon sa balay tambalanan ang biktima ug giingong stable na ang iyang kahimtang.
Karon, balhug na sa Valencia City Police Station ang suspek ug mag-atubang sa kasong Robbery with Frustrated Homicide.