Unang gipresentar ni lead defense counsel Atty. Nicholas Kaufman ang mga argumento sa depensa bahin sa alegasyong pagpatay sa giingong high value targets (HVT) sa administrasyon ni kanhing Pangulong Rodrigo Duterte sa katapusang adlaw sa confirmation of charges hearing niadtong Biyernes, Pebrero 27, 2026.
Sa submissions sa depensa, gi‑highlight ni Kaufman ang preliminary observations sa depensa bahin sa paghulagway sa Prosekusyon sa HVT isip ebidensiya nga adunay coordinated plan aron i-eliminate ang target.
Matod ni Kaufman, “The existence of a prioritization category within a law enforcement campaign does not establish a criminal plan.”
Gipasabot ni Kaufman nga ang HVT usa ka operational classification nga gigamit sa law enforcement, sama sa gigamit sa ubang nasud sama sa Australian Priority Organization targets.
Wala kini nagpasabot nga direktiba sa pagpatay o “witchhunt,” kundili usa lamang ka prioritization tool alang sa anti-illegal drug operations nga nakabase sa intelligence assessments ug watchlists.
Sumala niya, “Classification does not implies selection from murder, and more it is a proof of a lawful intent.”
Gipasabot usab ni Kaufman nga giila sa Prosekusyon ang pagpakita sa mga operational frameworks sama sa police circulars ug structured campaigns.
Daghan sa HVT operations, matod niya, misangpot sa pag-aresto o pagtahan sa mga indibidwal, samtang ang uban miresulta sa fatal encounters.
Gibutyag ni Kaufman nga ang matag insidente sa pagpatay sa HVT kinahanglan susihon base sa ebidensiya aron mahibal-an kung lehitimo ba ang operasyon o dili.