Patay nang nakaplagan ang usa ka katikista nga giila nga si Eugene Hinolos, 59 anyos, residente sa Dumalahay Subdivision, Purok-15, Barangay Casisang, Malaybalay City, pasado alas 9 sa buntag ning adlawa.
Base sa inisyal nga imbestigasyon, last pa nga nakit-an ang biktima niadtong Biyernes, Setyembre 19, ning tuiga.
Sa pakighinabi sa Bombo Radyo Malaybalay kang Ronnie Dugoan, kaubanan sa biktima sa simbahan, miluwat kini nga wala nakatambong sa usa ka katalingbanon nga kalihokan ug wala motubag sa mga tawag sa iyang cellphone.
Ning adlawa, giadtoan sa mga kauban ug kaila ang balay sa biktima ug nakita nga abli ang gate diin naka-park ang motorsiklo niini.
Atol sa pagsulod sa panimalay, nadiskobrehan sa luyo nga bahin sa balay ang lawas sa biktima nga naghayang, walay sapot sa ubos nga bahin, ug anaa na sa state of decomposition ang lawas niini.
Matud ni Dugoan, posible nga tulo ka adlaw nang patay ang biktima ug gituohang giatake kini sa hypertension.
Dugang pa ni Dugoan, nga nag-inusara lamang ang biktima sa panimalay niini. Samtang gidala na sa punerarya ang patay’ng lawas sa biktima ug gipahibalo na usab ang mga kabanay niini kabahin sa nahitabo.