Padayon pang ginaproseso sa mga otoridad ang kasong pagpanglugos ug pagpatay batok sa suspek sa brutal nga pagpatay sa 15-anyos nga dalagita sa Valencia City, bisan nakagawas kini sa prisohan human madismiss sa korte ang kasong direct assault.
Sumala ni PCpt. Sheila Joy P. Jangad, spokesperson sa Bukidnon Police Provincial Office, ang nadismiss nga kaso may kalabotan sa giingong pag-atake sa suspek sa usa ka barangay tanod sa dihang giadtuan kini sa mga otoridad isip person of interest human madiskobre ang patayng lawas sa biktima sa Barangay Dagat‑Kidavao.
Gipadayag sa kapulisan nga sa maong insidente gipatuman ang hot pursuit operation nga mitultol sa pagsurender sa suspek ug pagsaka sa kasong direct assault, apan nadismiss kini sa korte maong nakagawas ang suspek sa kustodiya.
Bisan pa niini, giingon sa kapulisan nga padayon ang legal nga proseso sa kasong rape with homicide ug naghulat na lamang sa pagpagawas sa warrant of arrest aron madakpan pag-usab ang suspek.
Samtang gawas sa prisohan, ginamonitor sa intelligence operatives sa kapulisan ang lihok sa suspek ug nagpasalig ang mga otoridad nga buhaton ang tanang lakang aron mapadayon ang kalinaw ug kahapsay sa Bukidnon.