Kasong pagpanglugos maoy pinakadaghan nga krimen sa Valencia City, samtang kapin 60 porsiyento sa mga kaso nahitabo ubos sa impluwensya sa ilegal nga droga, hinungdan nga gipakusgan sa kapulisan ang kampanya batok niini.
Sa pakighinabi sa Bombo Radyo Malaybalay, gipahayag ni PLCol Brayan Panganiban, hepe sa Valencia City Police Station, nga nagpadayon ang koordinasyon sa mga barangay ug City Social Welfare and Development (CSWD) aron mapugngan ang kasong pagpanglugos ug uban pang krimen sa siyudad.
Gibutyag ni Panganiban nga sa 2025, kapin ₱8 milyong balor sa ilegal nga droga ang nakumpiska sa nagkadaiyang operasyon, lakip ang pagdakop sa usa ka high-value individual nga empleyado sa gobyerno atol sa buy-bust operation.
Gibutyag usab niya nga mikunhod ang crime rate gikan 2024 hangtod 2025, tungod sa aktibong anti-drug operations, maayong deployment sa kapulisan, ug suporta sa lokal nga kagamhanan.
Gipamatud-an sa kapulisan nga nasulbad ug na-clear na ang tanang shooting incidents, samtang ang mga minor de edad nga nalambigit sa pagpanikas ug tulis gihatod na sa CSWD alang sa hustong social intervention aron mapadayon ang kalinaw ug kahusay sa dakbayan sa Valencia.