Padayon ang pagtaas sa mga kaso sa pagpang-abuso sa kabataan sa lalawigan, nga nakapa-alarma sa katawhan.
Matud ni Police Major Joann Navarro, tigpamaba sa Police Regional Office (PRO) 10, kadaghanan sa mga kaso sa pagpanglugos ug pagpanamastamas sa mga menor de edad, kasagaran gakahitabo sa sulod mismo sa panimalay sa mga biktima.
Gipasabot ni Navarro, nga kini nga klase sa krimen usa sa labing seryoso ug dakong hagit nga gitutokan sa kapulisan ning kasamtangan.
Dugang pa niini, nga adunay mga kaso nga nareport nga bulan pa lamang ang edad sa biktima, diin uban niini ang 8 ngadto sa 9 ka buwan nga bata nga gikuhaan og hulagway aron ibaligya sa mga langyaw sa online, nga usa ka porma sa cybersex trafficking.
Subay niana, gisiguro sa PRO-10, nga adunay hinanaling aksyon ug mga operasyon nga gilusad aron mapunggan ang pagdaghan sa susamang krimen.
Miluwat kini nga padayon ang ilang kooperasyon uban ang lain-laing ahensya sa gobyerno ug pribadong sektor aron sa pagrescue sa mga biktima, pagdakop sa mga responsable, ug pagpangusog sa kampanya batok sa pagpang-abuso.