Mipahayag si International Criminal Court (ICC) Assistant to Counsel Kristina Conti nga adunay 80% posibilidad nga magpadayon na sa trial ang kaso batok kang kanhi Presidente Rodrigo Duterte ug sa iyang mga kauban. Kini human sa desisyon sa ICC nga adunay hurisdiksyon kini sa pag-imbestigar sa gyera kontra droga sa miaging administrasyon.
Matod ni Conti, klaro nga timailhan kini nga magpadayon ang imbestigasyon aron matino kung kinsa pa ang mga responsable o kauban ni Duterte sa kampanya. Posible usab, matod niini, nga adunay laing warrant of arrest nga ipagawas batok sa ubang personalidad.
Gisugyot usab ni Conti nga mas maayo kung buot man nga maaresto, sama ni Senador Ronald “Bato” Dela Rosa, nga mosurender na lang sa korte ug atubangon ang kaso.Gipasabot niya nga mahimo kini buhaton aron direktang makapangutana sa merito sa kaso ug maayong proseso sa hustisya.