Nakumpiska ang 9.46 kilos nga lechon gikan sa usa ka establisemento sa PGB Night Market, Malaybalay City, tungod kay wala kini moagi sa slaughterhouse.
Sa pakighinabi sa Bombo Radyo Malaybalay kay Bren E. Lero, Meat Control Officer II sa City Veterinary Office, gipadayag niini nga ang insidente nahitabo niadtong Disyembre 12, ug kini supak sa City Ordinance 941 o Meat Inspection Code. Ang Task Force Karne nag-inspeksyon sa tanang karne nga ibaligya publiko, ug tanang produkto nga walay Meat Inspection Certificate mahimong kumpiskahon.
Gipasabot ni Lero nga ang mga lechon vendors nangayo og “apas ihaw” aron makahimo sa slaughterhouse sa gabii o kaadlawon, ug gisuportahan kini sa slaughterhouse aron masiguro ang kaluwasan sa karne. Sa pagkakaron, tanang establisemento nga wala mosunod sa balaod kay gihatagan og pahimangno ug kumpiskasyon sa karne, samtang ang sunod nga paglapas mahimong pasakaan og pormal nga multa.
Gipahimangnoan usab sa Meat Control Officer ang publiko ug mga negosyante sa Malaybalay nga magsunod sa balaod aron masiguro ang luwas nga karne alang sa konsumidor ug malikayan ang legal nga silot.