Mukabat na sa kapin P8 milyon ang kantidad sa illegal nga droga ang nakumpiska sa kapulisan sa Valencia City sa miaging tuig 2025, diin lakip niini ang pipila ka minors.
Sa eksklusibong pakighinabi sa Bombo Radyo Malaybalay kang PCol. Bryan M. Panganiban, Hepe sa Valencia City Police Station, gibutyag niini nga sa syudad, anaa sa 60 porsyento sa operasyon niini ang nalambigit sa illegal nga droga.
Miluwat kini nga bag-ohay pa lamang nasikop ang high-value indibidwal nga gitouhang usa ka government employee.
Sa maong operasyon, nadakpan kini ug nakuha ang 5.5 gramos nga shabu nga nagkantidad og P37,400.
Gikaingong aktibo nga pusher ang suspek.
Hinuon, gilihok na ang kasong ipasaka batok niini.
Samtang sa laing bahin, gipasigarbo usab ni Panganiban, nga mikunhod ang crime rate sa syudad, nga nagpamatuod sa epektibo nga kampanya batok sa illegal nga droga ug uban pang kampanya batok kriminalidad sa Valencia City Police.