Padayong gipakusgan sa lokal nga kagamhanan ang kampanya batok paggamit sa illegal nga droga, pinaagi sa pagpalapad sa random ug surprise drug testing diin lakip niini ang kapulisan sa dakbayan.
Matud ni Jun Galario, kanhi-mayor ug kasamtangang consultant sa LGU Valencia City, nakapalit na og dugang drug testing kits ang lokal nga kagamhanan aron masiguro ang internal cleansing, lakip na ang mga personahe sa kapulisan nga anaa sa frontline sa pagpatuman sa balaod.
Kahinumdoman nga unang nagpahigayon og drug testing ang LGU sa kapin 300 ka empleyado, diin walo (8) kanila ang nagpositibo.
Ang mga nagpositibo, kasagarang job order employees nga gipangtanggal na, lakip niini ang usa gikan sa Traffic Management ug unom gikan sa Environmental Office.
Samtang ang mga regular employees nga mahimong magpositibo posibleng ipailawom sa tukmang proseso, lakip na ang rehabilitation, sumala sa guidelines sa Civil Service ug sa national agencies.Â
Dugang pa ni Galario, padayon nga ipatuman ang sunod-sunod nga surprise ug random drug testing sa tanang departamento aron mapalig-on ang integridad sa serbisyo publiko ug suportahan ang kampanya sa national government batok illegal nga droga.