Gipaniguro sa Police Regional Office 10 ang hugot ug wala’y pili nga pagpatuman sa disiplina sulod sa han-ay sa kapulisan, hilabina batok sa mga nalambigit sa illegal nga droga ug seryosong kalapasan.
Matud ni PMaj. Joann G. Navarro, tigpamaba sa Police Regional Office 10, nga hingpit nang gitangtang sa serbisyo ang mga kapulisan nga nagpositibo sa random drug testing nga gipahigayon sa tuig 2025.
Lakip usab natangtang sa serbisyo ang duha ka opisyal ug lima ka pulis nga napamatud-ang sad-an sa kasong Grave Misconduct.
Ang gipangtangtang sa serbisyo naglangkob sa usa ka Police Major, Police Captain, Police Staff Sergeant, ug upat ka Police Corporal, ug kabahin sa silot ang pagkansela sa tanang eligibility, pagkawala sa mga benepisyo sa pagretiro, ug pagpahamtang sa tibuok kinabuhi nga diskwalipikasyon sa paghawid o pagbalik sa bisan unsang posisyon sa gobyerno.
Gipadayag usab ni PMaj. Navarro, nga padayon ang hugot nga internal cleansing ug random drug testing aron mapadayon ang integridad, propesyonalismo, ug pagsalig sa katawhan sa kapulisan.