Blangko pa ang kapulisan sa motibo sa pagpamusil sa wala mailhing mga suspetsado sa usa ka kawani sa lokal nga kagamhanan sa Impasug-ong samtang kini paingon sa trabaho, hinungdan nga naangol samtang nagpaalim karun sa balay tambalanan.
Sa pakighinabi sa Bombo Radyo Malaybalay, Gipamatudan ni PMaj. Dino Cuevas, hepe sa Impasug-ong Municipal Police Station, nga nahitabo ang insidente pasado alas 6:40 sa buntag, Hulyo 26, 2025, sa Purok-5A, Barangay Poblacion.
Ang biktima, nailhan lamang sa alyas “John Dave”, 49 anyos, minyo, ug residente sa GK Village, Barangay Poblacion, napusilan sa tangkogo sa duha ka suspek nga sakay og motorsiklo ug daling misibat pagkahuman sa panghitabo.
Nakuha sa crime scene ang basiyo sa bala nga gituohang gikan sa .45 caliber nga armas. Gikumpirma usab ni PMaj. Cuevas nga padayon ang ilang pag-review sa CCTV footages aron matino ang mga suspetsado ug motibo sa maong krimen.