Gipahibalo sa kapulisan sa Bukidnon nga andam na ang ilang deployment plan alang sa umaabot nga Northern Mindanao Regional Athletics Association (NMRAA) ug Kaamulan Festival aron masiguro ang kalinaw ug kahapsay sa mga lungsoranon ug delegates.
Sa ekslusibo nga pakighinabi sa Bombo Radyo Malaybalay ni PCpt. Sheila Joy P. Jangad tigpamaba sa Bukidnon Police Provincial Office, gibutyag niiini nga kompleto ang personnel ug adunay dugang suporta gikan sa Regional Office aron matabangan ang mga police sa mga lungsod ug siyudad sa probinsya.
Matud ni Jangad, nga gisiguro nga adunay mga kapulisan nga nagbantay sa publiko ug andam moresponde sa bisan unsang emerhensya.
Gibantayan usab sa kapulisan ang mga billeting area sa mga atleta ug coaches, ug adunay mga police force multipliers nga magtan-aw sa seguridad sa mga participante.
Gipunting sa opisyal nga klaro ug makita ang presensya sa kapulisan sa mga billeting sites ug sa tanang aktibidad sa NMRAA aron masiguro ang kaluwasan sa tanan.