Gihatagan og klaripikasyon sa Kapitan sa Barangay 9, ning syudad, ang nag-viral nga mga hulagway sa flood control mitigation project nga nagkantidad og P96.4M nga hugno sa pipila ka bahin niini.
Sa eksklusibong pakighinabi sa Bombo Radyo Malaybalay, gipadayag ni Kapitan Dexter Gamo, nga ang proyekto kasamtangang anaa pa sa kontraktor ug wala pa naturn-over ngadto sa barangay o sa lokal nga kagamhanan.
Matud pa sa Kapitan, nasayran sa Department of Public Works and Highways kon DPWH nga adunay guba ang bahin sa flood control, hinungdan nga gipautro kini. Apan, samtang wala pa ang curing process, miigo ang kusog nga ulan.
Giklaro usab sa Kapitan, nga ang barangay wala’y kalabutan sa alegasyon nga adunay anomalya sa proyekto.
Dugang pa niini, nga responsibilidad kini sa DPWH ug kontraktor hangtod kini pormal nga mahatagan og turn-over sa lokal nga kagamhanan.
Apan base usab sa detalye sa sumbongan sa pangulo website, nakasaad nga ang target nga pagkompleto sa proyekto kaniadtong Pebrero 28, 2023.
Bisan pa man niini, wala pa kini hingpit nga natapos ug naturn-over. Samtang, nanawagan si Kapitan Gamo, nga dili dayon hukman ang proyekto ug hatagan og panahon ang DPWH aron marepair ang mga depekto aron masiguro nga ang proyekto magpabilin nga lig-on ug mapuslanon sa katawhan.