Gibanabana nga kapin sa 100,000 ka mga deboto ang nitambong sa Midnight Mass sa Quirino Grandstand para sa kapistahan sa Poong Jesus Nazareno. Ang maong misa gipangunahan ni Bishop Rufino Sescon isip puli ni Cardinal Jose Advincula nga atua karon sa Vatican. Sa iyang wali, gipasiugdahan ni Bishop Sescon ang kamahinungdanon sa pagpaubos, sama sa gibuhat ni Jesus Nazareno nga nikanaug ug nagpakasakit tungod sa gugma sa katawhan.
Wala usab magduhaduha ang Obispo sa paghatag og mahait nga mensahe batok sa mga opisyal sa gobyerno nga nagdumili sa pagkanaog sa pwesto bisan kon dili na sila angayan o wala nay maayong serbisyo nga nahatag, ilabi na taliwala sa kalisod sa mga kabus ug sa mga katalagman sa nasod.
Tungod sa kadaghan sa mga deboto, gi-extend sa Quiapo Church ang tradisyunal nga “Pahalik” sa imahe hangtod sa Enero 10, alas-10 sa buntag, aron mahatagan og higayon ang tanan nga makaduol sa Mahal nga Nazareno.