Nag-atubang na sa kasong paglapas sa RA 9165 o Comprehensive Dangerous Drugs Act of 2002 ang mag-uyab nga sila si alyas “Gilbert,” 23 anyos, ug alyas “Mae,” 19 anyos, human masakmitan sa kapin ₱2 milyon kantidad nga gituohang shabu sa Kalilangan, Bukidnon.
Nasikop ang manag-uyabo atol sa anti-illegal drugs operation sa Purok-1, Barangay Central Poblacion, Kalilangan. Si “Gilbert” giila isip High Value Individual ug residente sa Nabunturan, Davao de Oro, samtang si “Mae” taga Montivesta sa maong probinsya.
Nakumpiska sa operasyon ang tulo ka dagkong pakete nga adunay sulod gituohang shabu nga mokabat sa 298.20 gramos ug nagkantidad og Php 2,027,760. Apil usab sa narekober ang sling bag, pitaka, cellphone, mga ID, kwarta, ug motorsiklo nga gigamit sa pagpamaligya. Ang duha anaa na sa kustodiya sa Kalilangan Municipal Police Station alang sa tukmang proseso.