Nasikop ang tulo ka indibidwal human masakmit gikan sa posisyon niini ang gituohang shabu nga may kinatibuk-ang kantidad nga mukabat sa P527,000.00 atol sa gipahigayon nga drug buy-bust operation sa Purok 13, Poblacion, Valencia City, Bukidnon, niadtong Marso 1, 2026, sa may alas 1:32 sa hapon.
Sa report ni PCOL Oliver Sotto Navales, Provincial Director sa Bukidnon PPO, ngadto kang Regional Director PBGEN Christopher Nortez Abrahano, ang malampusong operasyon gilusad sa hiniusang pwersa sa Bukidnon Provincial Drug Enforcement Unit (PDEU), Valencia City Police Station, Buk 2nd PMFC, ug Valencia City Anti-Drugs Special Unit Team (CADSUT) ubos sa koordinasyon sa Bukidnon Provincial Intelligence.
Ang mga suspetsado, nga nag-edad og 37, 43, ug 48 anyos, nakuhaan og 26 ka sachet sa gidudahang shabu nga motimbang og 77.5 gramos, lakip na ang P1,000.00 nga buy-bust money, usa ka Infinix smart phone, ug usa ka Nissan Navara pick-up nga adunay plate number KAE1370.
Kasamtangang giandam na ang mga kasong paglapas sa Article II, Section 5 ug 11 sa R.A. No. 9165 batok sa mga dinakpan.