Gitagana sa lokal nga kagamhanan sa Malaybalay City, Bukidnon ang kapin sa 40,000 ka kahon sa Handog Pamasko alang sa halos tanang panimalay sa syudad. Sa pakighinabi sa Bombo Radyo Malaybalay kay Mayor Jay Warren Pabillaran, gipadayag niini nga nagsugod na niadtong Disyembre 28 ang delivery sa mga kahon sa Upper Pulangi area, samtang sunod semana ang opisyal nga pagpanghatag sa ubang barangay.
Hinungdan ang kalangan sa kakomplikado sa proseso sa Bids and Awards Committee, apan tungod sa mas baratong bidder gikan sa Cagayan de Oro nga nakatipid og hapit ₱1 milyon, gidugangan ang ihatag nga kahon ug napalapdan ang coverage ngadto sa labaw 40 ka barangay, gikan sa kaniadto nga limitado ra sa pipila ka gagmay nga barangay.
Gisiguro usab ni Mayor Pabillaran nga gi-deploy ang mga water tanker sa habagatang bahin sa Malaybalay samtang padayon ang water system project nga nagkantidad og ₱325 milyon gikan 2023 hangtod 2026, aron ma-stabilize ang suplay sa tubig gikan San Jose padulong Bangcud ug Aglayan, diin padayon ang pipe-laying sa Aglayan paingon Cabangahan.
Gipasiugda sa mayor nga prayoridad sa city government ang farm-to-market roads, diin ₱30 milyon nga pondo gikan sa Department of Agriculture ang giatubang karong Disyembre para sa Barangay Simaya ug Barangay Maligaya, lakip ang pagkumpleto sa City Hall building ug uban pang proyekto alang sa padayong kalamboan sa syudad.