Niabot na sa kapin 2,000 ka tawo ang gikatahong napatay sa sunod-sunod nga mga protesta didto sa Iran, sumala sa usa ka human rights group.
Base sa report gikan sa Human Rights Activists News Agency (HRANA), mokabat sa 1,850 ka mga protesters ang kumpirmadong namatay, 135 gikan sa security forces, siyam ka sibilyan, ug lakip na ang siyam ka mga bata sa niaging 17 ka adlaw. Sa pikas bahin, usa ka opisyal sa Iran ang nikumpirma usab nga niabot sa 2,000 ang napatay, apan iyang gibasol ang mga “terorista” nga maoy nagpasiugda sa kagubot.
Nagsugod ang maong mga protesta niadtong Disyembre 28 tungod sa grabeng krisis sa ekonomiya ug ang pagsaka sa presyo sa mga palaliton sa nasud.
Tungod sa kagubot, gikanselar ni US President Donald Trump ang tanang pakigpulong sa mga opisyal sa Iran hangtod nga moundang ang pagpamatay sa mga protesters.
Nisaad usab siya og tabang alang sa katawhan sa Iran ubos sa iyang panawagan nga “MIGA” o Make Iran Great Again.