Gilauman nga moabot sa kapin duha ka milyones ka mga turista gikan sa nagkadaiyang dapit sa kalibutan ang mudagsa sa Japan alang sa pagsugod sa tinuig nga Sapporo Snow Festival sa Hokkaido. Ang maong festival, nga usa sa pinakadako nga winter event sa nasod, pormal nang giablihan diin gipasundayag ang ginatos ka mga dagkong estatwa nga gama sa yelo ug snow.
Makita sa tulo ka mga dagkong site—ang Odori, Susukino, ug Tsudome—ang mga disenyo nga naglakip sa mga sikat nga karakter, mga nindot nga istruktura, ug mga dapit nga kalingawan alang sa pamilya. Tungod sa kadaghan sa mga tawo nga gilaumang mobisita, hugot usab nga gipatuman sa lokal nga kagamhanan sa Sapporo ang mga protocol sa seguridad ug kalimpyo aron masiguro ang hapsay ug luwas nga kasinatian alang sa tanang bisita.