Mukabat sa kapin PHP 48,000.00 nga kantidad sa mga smuggled nga sigarilyo ang nakumpiska sa sunod-sunod nga operasyon sa kapulisan sa nagkadaiyang lungsod sa probinsya sa Bukidnon niadtong Pebrero 26, 2026, nga miresulta usab sa pagkasikop sa lima ka mga suspetsado.
Sa Valencia City, nasikop ang usa ka 27-anyos nga lalaki sa Barangay Kahaponan human makuhaan og 29 ka reams sa sigarilyo nga nagkantidad og PHP 23,200.00 samtang kini naghatod sa maong kontrabando. Samtang sa lungsod sa Talakag, nasikop ang usa ka 37-anyos nga tag-iya og tindahan sa Barangay San Isidro human makuhaan og 11 ka reams nga mobalor og PHP 8,800.00.
Gisundan kini sa operasyon sa Kibawe diin usa ka 61-anyos nga lalaki ang nakuhaan og siyam ka reams nga nagkantidad og PHP 7,200.00 sa Barangay East Kibawe. Sa Kitaotao, nadakpan ang usa ka 41-anyos nga lalaki sa Barangay Malobalo human makuhaan og pito ka reams nga mobalor og PHP 5,600.00, samtang sa Baungon, nakuhaan usab og upat ka reams nga nagkantidad og PHP 3,200.00 ang usa ka tindero sa Barangay Imbatug.
Ang tanang mga dinakpan gidala sa tagsa-tagsa ka estasyon sa pulisya alang sa dokumentasyon ug ang mga nakumpiskang sigarilyo gitugyan na ngadto sa Municipal Health Office sa matag lungsod alang sa saktong disposisyon.