Gikataho sa Bureau of Fire Protection (BFP) Bukidnon nga mokabat na sa kapin 4 milyon pesos ang kinatibuk-ang damyos sa mga sunog nga nahitabo sa probinsya sukad Enero hangtod Marso ning tuiga.
Sa pakighinabi sa Bombo Radyo Malaybalay kay SFO2 Reny R. Rubillos, Officer-In-Charge sa Fire Safety Enforcement sa BFP Bukidnon, kadaghanan sa mga sunog giingong hinungdan sa electrical issues sama sa napasagdang appliances, unattended cooking, kandila, ug grass fires.
Gipasabot usab niini nga nagpadayon ang ilang pahimangno ilabina karong Fire Prevention Month aron mapugngan ang sunog pinaagi sa pagdoble-check sa mga appliances, pagbantay sa pagluto, ug pagsiguro nga mapalong ang kandila sa dili pa biyaan ang panimalay.
Dugang pa, naka-heightened alert ang BFP Bukidnon karong Semana Santa diin adunay andam nga deployment plan, assistance desks sa kadalanan, ug fire truck visibility sa mga simbahan ug panagtapok aron masiguro ang kaluwasan sa publiko.